Tirkiye ciwanên Sûriyeyî bi darê zorê dibe leşkeriyê
Rêveberiya dewleta Tirkiyeyê ciwanên penaber ên Sûriyeyî bi darê zorê di operasyona Mertalê Firatê de bikar tînin.
Li gorî agahiyên Ajansa Nûçeyan a Farsê (FHA) ku ji çavkaniyên Sûriyeyî wergirtine, hat îdia kirin ku polîsên dewleta Tîrkiyeyê bêyî hincet ciwanên penaber ên Sûriyeyî desteser dikin û dibin cihekî nayê zanîn.
Di nûçeyê de hat diyar kirin ku çavkaniyan gotine Enqere wan ciwanên Sûriyeyî bi darê zorê di operasyona Mertalê Firatê ya li Sûriyeyê de bikar tîne û di derbarê vê mijarê de delîl di destê wan de hene. Hat ragihandin ku polîsên Tirk li bajarê Rihayê ji otêlekê 20 û ji kampekê jî 50 ciwanên Sûriyeyî desteserkirine û her wiha bi ser hinek malên Sûriyeyiyan de jî girtine û ciwanên wan malbatan jî ji bo operasyona Mertalê Firatê revandine. (BANGÊ ÎSLÂMİ)
