Serokomarê Iraqê bernameya atomî pesend kir

Serokomarê Iraqê Fûad Mehsûm yasaya destpêkirina bernameya atomî ya Iraqê û yasaya bûdceya sala 2017ê pesend kir.

Li gorî ragihandina Serokatiya Komarê ya Iraqê, roja sêşemê (10-01-2017) Serokomar Fûad Mehsûm yasaya destpêkirina bernameya atomî ya Iraqê û yasaya bûdceya sala 2017ê pesend kir, ku beriya niha ji aliyê Parlamentoyê ve hatibû erêkirin.

Hate ragihandin, ku yasaya atomî bernameyeke aştiyê ye, bi armanca pêşxistin û sûdwergirtina enerjiya atomê komîsyonek hatiye amadekirin. Ev komîsyon di mijarên bikaranîna enerjiya atomê, di kertên pişesazî, tendurustî, çandinî, berhemanîna elektrîkê, sûdwergirtina ji çavkaniyên avê û cîbicîkirina teknîna enerjiya atomê de dê lêkolîn û karan bike.

Bi cîbicîkirina vê yasayê, Iraq dê hewl bide bernameya atomê ji bo pêşxistina zanistî û tekonolojiyê bikar bîne.

Herwiha Serokomarê Iraqê yasaya bûdceya sala 2017ê pesend kir, ku dawiya sala borî piştî gengeşiyeke zêde ev yasa ji parlamentoyê re derbas bibû. (BANGÊ ÎSLÂMİ)